05
Sep 15

她與他約我到亮記海鮮飯店

人生中,應該呢個係我第一次寫嘅食評。希望唔會九唔搭八。
ok 返正題,識我嘅都知道,我食野主要係睇性價比。好簡單一個「好食」如果拆散件,入面應該有價錢 ,味道 ,氣氛 同環境 。(留意返,係價錢行先,大佬鬼唔知天空龍吟好食咩。我唔係富貴L,要睇價錢架 )。所以任你幾好食,只要其中一方唔成正比,我會答你「麻麻啦/一般啦」。今次難得受Studio女神Kar 姐同祖記相約就摸下飯碗吹下水試下寫下食評。

今晚聚會地點,係西灣河市政大廈嘅亮記海鮮飯店。係Kar姐屋企人開,之前呢位孝順女都因為要幫手所以成日唔得閒出嚟食飯,今次終於有幸可以約到佢之餘,重可以品嚐到佢屋企人手勢,真係榮幸。貴為港式大排檔,鑊氣份量味道人情為評分重點。要試一檔大排檔有冇料子,最緊要係試一D 簡單菜式。我地叫左幾樣小炒,有小炒王、炸大腸、蒜蓉炒白菜、咕嚕肉、蒸扇貝、蛋白瑤柱炒飯。出爐小炒王為我同祖記首選,只因佢呢度鑊氣火爆,炒野如小炒王,蒜蓉炒白菜,都特別惹味。炸大腸脆皮肥美,咕嚕肉彈牙酸甜突出。憑我地點嘅簡單小菜,就可以結論,呢度比起其他大排檔真係above average 之上。最緊要,就個日所見,老闆重會同食客吹下水傾下計。人情味真係滿分,呢D先係大排檔。岩岩港隊抗共成功,真係想今日係度炒旺個場。啊,未俾評語,如果問我,我會話「係好食嘅」,重會想覆灼添 !
11994467_10155957346140322_999025666_n 11995586_10153529298121271_418439299_n 11995714_10155957346200322_643276906_n 11911684_10155957346225322_1893088248_n
不過講開大排檔,香港嘅大排檔真係有好多改善空間。香港貴為旅遊乜乜柒柒,又係飲食柒柒乜乜。真係唔多見推廣下本土特色。除左茶記,其實大排檔都係香港文化其中一環。但係就好似永遠都無人推廣咁。可能政府覺得呢D 係次檔野,要高檔要先會拎嚟威下。但係,你去外國,其實地道野先係主打,所以真係搵唔到個理由去加強大排檔文化。唔洗講咁多, 淨係睇最出名嘅東寶,有幾多人慕名而來就知潛力可以有幾大。前排,重要有人upload 左條同東寶老闆一齊跳舞嘅片。D 外國人睇到,知道有咁正嘅餐廳,重唔仆晒過去? 所以呢我嘅愚見係,如果你話我嘅理想大排檔係點樣,我會答你,好玩,好食,顛得起。大排檔伙記多D 出嚟同食客吹下水,與民同樂,咁就真係最正啦。希望今次帶到新思維俾有緣睇到呢篇文嘅人。搞起大排檔,到時,嚟過香港嘅鬼佬就會記得,食茶記個陣時呢就係日頭,大排檔個陣就係夜晚。
11992239_10153529298141271_1722474098_n
再次多謝Kar姐安排,想見下studio 女神,唔洗用劍嘅,落去幫襯就得(好似係) 。

02
Jul 15

四個香港不需靠中央的理由

(編者按:作者本文是回應雷鼎鳴本日在《晴報》的文章〈雷鼎鳴 – 將佔中損失限在11000億?〉)

 

雷教授:「我們倒是要擔心,關係是否變差,香港會被中央視為負債,我們也不易找出一些超級推銷員,成功說服中央多給予香港各種優惠政策,或更倚靠香港這一金融中心、航運中心等。要知道,這些生意,都是不少其他省市所要爭取的,不一定要給予香港。倘若香港失去了中央的信任,對經濟的打擊便絕非每天十餘億這麼簡單了,未來數十年的經濟都會受此影響。」

回應:香港未回歸之前一直都無「中央」扶持咪又係生活得好地地。做乜搞到我地好似要拎綜援咁。如果真係無左扶持而仆直,只係我地某部分人一直以黎好似廢人咁攤大手板拎飯食嘅結果。

 

雷教授:「要知道,這些生意,都是不少其他省市所要爭取的,不一定要給予香港。」

回應:金融中心、航運中心,全都唔係「中央」德政下所出黎嘅產物。大陸一直將呢幾樣野Copy To China ,而不斷搶生意咁樣係咪叫幫我地?  如果真係可以俾大陸其他省市做,點解唔做? 好簡單,係因為做唔到,點解阿里巴巴唔係上海上市先? 教授,唔好靠嚇啦….

 

雷教授:「我們姑且認為香港經濟會受到佔領運動的影響而「轉勢」,但我們不妨「樂觀」地假設這個勢轉得不大,經濟的長期平均增長率只下跌0.1%,亦即由2.8%下降至2.7%。有些人可能會視0.1%為很小,有些人會接受這幅度,但認為0.1%是太大的我相信不多。我們知道今年香港GDP大約2萬2千億,假若以後的實質增長從2.8%跌至2.7%,那麼在30年內的總實質損失是多大?」

回應:香港人向來強韌,識打逆境波。所有數字assume 係香港係攤大手板咪有機會咁倒退。不過其實都岩嘅,係中央嘅agenda度,根本就係唔比你做到好似新加坡咁。GDP 升得慢都好正常。妹仔大過主人婆,你懂的。

 

雷教授:「香港的股市也厲害,從9月3日到9月30日,恒指跌了9.4%,遠超同期歐美跌幅,帳面財富蒸發了近2萬4千億元。此種下跌有部分是因佔中的預期,有部分其他因素,但正如我在本欄曾說明過的,我只用保守的算法,把上市公司的損失看成是3,500億。」

回應:之前雷教授話佔中導致會令股市趺市,而估中之後香港股市表現更比環球金融市場為好,你又拎佔中之前黎講,真係神又係你鬼又係你。

 

結論: 數字係死,人係生。回歸以來,香港人不斷被矮化,亦都不斷被不同嘅扶持削弱競爭力。其實香港人最怕就係有朝一日連打逆境波嘅機會都無。

 

(寫於24/10/2014)


02
Jul 15

事先張揚買iPhone的博奕理論

仲有幾個鐘就係買iPhone6 嘅時間,相信今日大家都係魂不守舍諗點樣可以買到呢部聲稱Margin 有超過50%嘅機。廢話少說,我今日要講嘅Tips 係,「唔好賺到盡」。其實炒機同炒股都係一樣,羊群心理。但有少少唔同嘅係,今次你要同人搶貨。捉到群眾心理,有貨,你先叫有機會賺。名乎其實,All or Nothing。

講咁耐點先可以乘到呢水iPhone 浪可以執到一轉快錢呢。答案好簡單,炒D 利潤無咁高嘅款,即係執最唔搶手嘅貨。呢幾日,某先達莊家係咁放風話6+ 128GB 金色Margin 最大,完全做足財演做嘅野。我第一時間就諗,傻豬黎嘅,Margin 最大即係風險最高啦。一窩蜂去搶同一款,你買到個機會可能細過抽新股。另外炒價係由莊家去訂,一日未上板未有實際交易,呢個價值可以話唔存在。

資料來源, 經濟日報
資料來源, 經濟日報

再陰謀D 睇,係想你地搶晒128之後佢地自己可以搶64GB同16GB ,係呢個case無論咩原因都唔應該去爭。好喇,講左一論至於買邊個model,精明嘅你一定會知嘅,祝你地好運。

(寫於12/09/2014)

 


02
Jul 15

再來六個不創業的理由

不知這陣子是否靈感乾涸還是墨水用盡,就一直找不到一個好的題材去為全民媒體「開個靚頭」。(係,我足足諗左兩個星期! )所以今日睇到社長寫左一篇「不創業的六個理由」有感,所以唔理三七廿一,參一腳。旨因我至鍾意潑冷水,而大家對創業呢件事總會有幾分美麗嘅幻想,而實際對創業有誤解嘅,無九成都肯肯定有八成。所以呢個題目我絕對應該寫,就當做補完資料俾大家作個參考,繼續拾人牙慧,拾話狗說。

在此我先鄭重聲明,創業唔係真係玩玩下貪過癮,如果以下係你嘅原因走去創業,你都係乖乖地返去打返份工好過啦。唔好聽到D借貸廣告話「有得揀你至係老闆」就走出黎。點解?因為創業唔係由香港移民去到瓦努阿圖嘆世界咁簡單,而係好似北韓咁成功登陸太陽!研究話九成嘅Start ups都會失敗,成為巨企嘅Start ups成功率更低過0.1% 。所以如果你因為存有以下思想而創業,我勸你及早回頭是岸。

1.  擺脫變態老闆 - 10個打工仔,9個覺得自己老闆變態,重有1個當正佢係殺父仇人。覺得永遠老闆嘅慾望都係無限,而打工仔永遠係受屈辱個位。所以為左永遠唔洗對D 變態老闆,一定要自己打自己工。OK!如果你係呢個原因創業嘅話,我會同你講,你創業之後你老闆由一個會變成十個,甚至會變成一百個。因為你老闆由你直屬上司將會變成客戶。滿足佢地嘅需要,變成你每一日重緊要過食飯嘅野。客嘛,they are animals,always hungry 你懂的。

1395328_10151781074606840_1185610530_o

2.  追求Work Life balance - 好多人覺得自己成為老闆,就鍾意幾點返工幾點放工都得。冇錯確係可以幾點返工幾點放工都得,但係同追求work life balance 係兩回事黎。基本上,你未係張床蓋埋雙眼嘅一刻,你都要全力睇住間公司,追求收入,以維持生繼,對抗強迫金嘅蠶食,以及防止競爭對手出陰招為公司帶黎嘅傷害等等等等。所以如果你明白Work Life Balance係指你每日20小時都做緊自己享同做緊嘅野,恭喜你。Welcome to the Entrepreneur world。否則,去考政府工把啦。

3.  做自己想做嘅事 - 自己成為老闆,絕對唔係做緊你自己想做嘅野,創業初期,每一分每一毫都要洗得有價值,除非你有大把錢請班人返黎幫你做野,否則所有濕星野一定係自己包底,例如幫同事訂文具。而係老闆圈中最有共嗚,莫過於要自己填MPF Form。呢D,絕對唔係你創業最想做嘅事情。

4.  賺好多好多嘅錢 -創業的確為你帶黎富有嘅機會,隨時捱幾年,你銀行零頭多幾個位,由Standard去到有Prestige 專員服待你。不過,唔代表你係財務自由。我唔直接答你,我用例子。當公司一直發展,你享受嘅會係成果,但同時需要做風險管理,呢一筆錢就係預防有突發事故嘅發生,公司越大,越需要做風險管理。講白一點,如果你個客唔找錢俾你,你有冇心理準備幾個月食西北風,假設你有班員工,自己唔食,佢地可唔可以唔食?所以我識嘅一部分白手興家嘅890後,佢地公司一年純利可以過千萬,但係過嘅日子仍然好樸素,每個月拎到出黎嘅錢分分鐘只係每個星期夠去O Zone飲杯野。講到呢度,我有D掛住D靚女Bartender。

5.  追求工作上嘅快樂 - 創業過程係快樂,但每一個老闆心情都會隨住過山車而浮動。皆因,創業過程直頭重刺激過笨豬跳,每日都可以大起大落。但係呢種每日都唔同觀感嘅刺激好容易令你忽略自身生理同心理健康,容易積勞成疾。特別係心理,好多人可能係唔知情嘅情況下患上抑鬱等病;外國創投圈亦開始關注創業家們心理上嘅健康。拉返近到香港,我有個靚女朋友,之前亦因為公司周轉不靈,而令自己患上抑鬱症,真係我見猶憐……你地心理係咪已經準備承受呢種刺激?

growhtchart

6.  想成為下一個Mark Zuckerberg - Oh come on,你有冇人地咁叻先? 之但係,呢個世界好多人都叻過佢,都唔一定成功。所以你想成為下一個佢,諗清楚目的先。係咪貪佢型?你知唔知人地想改變成個互聯網嘅理念?定話想好似佢咁多錢?如果係,我建議你不如去淘寶買條法拉利車匙落Beijing扮富二代算啦。

講到呢度,可能你會覺得我好涼薄,好誇張,狗嗡,但我相信每個人都有自己嘅終點。畢竟每個人都有唔同特質性格,並不是每個人都適合創業,如果你抱以上心態創業更甚。所以早一步認識自己,好過聽信「成功案例」,自走歪路。有機會再講。

(寫於13/08/2014)

 


11
Jun 14

認識長毛黑白照背後操刀人

近日香港政治鬧得沸騰,矚目議題太多,想談的反而是長毛近日被瘋傳的一張黑白相。相中被配上陳獨秀當年一句「行無愧怍心常坦,身處艱難氣若虹」,突顯長毛在政壇上漢子本色。如此好圖,瘋傳過後卻沒有人知道背後操刀人,實為可惜。呢輯相乃我大學宿友Martin Lui為記錄香港政治面貌而攝,雖然詳細還未能披露,但由2012年起就為一眾左中右政治人物拍攝硬照。經問準下,我轉載了一部分。希望大家欣賞之餘,俾返個credit同支持背後操刀人,繼續留意呢個項目發展。

 

425025_10150952724997001_176051832_n (1)

 

 

581996_10150978327482001_142223370_n 418861_10151044935177001_707568678_n 919727_10151380515002001_915604590_o 304699_10150990041577001_1242494743_n 260554_10151016730272001_1329317181_n

 


18
Dec 13

由怪獸年代去到恐龍年代的 Dinovember

今日係Facebook 見到一張圖,我覺得幾有意思。

回帶返廿年前,我諗以上對話大家都聽唔少。
但事至今日,影響整個社會嘅年代金句 – 「贏在起跑線上」
將整個社會文明進化至另一個層次。
呢條所謂嘅起跑線,其實係每一位家長心裡都唔知係邊度嘅一個位置。
但為左唔執輸行頭,慘過敗家,
呢條起跑線,結果變左係變成家長與家長之間嘅鬥爭。
而「怪獸家長」嘅誕生,就係專稱呢班橫蠻無理盲目透過仔女力爭上遊嘅父母。
結果係點?  一個又一個好假嘅肥仔慢慢誕生。
而家嘅下一代,無左我地當時童年嘅純真可愛,又無左細細過應該有嘅想像力。
而家諗返,以前隨手拎起一件玩具,
都可以發下白日夢,諗到好多無聊玩意嘅日子,
呢段美好嘅時間,對比現在被課外活動填滿嘅時間實屬奢侈。

係外國,有班父母,因為抗拒科技過於發達,令子女沈迷電子科技多於探索和想像呢個世界。所以搞左一個叫做Dinovember 嘅活動。
佢地希望透過Dinovember 呢個活動,希望子女唔好淨係透過Google it一鍵去探索呢個世界,而係希望佢地可以透過「好奇」同埋「想像」去感受呢個世界。
點做?
都幾搞笑,就係話俾佢地仔女知,其實屋企嘅玩具恐龍會係佢地訓覺之後出黎活動,
當然家長靜雞雞係佢地訓左之策略恐龍們嘅一切活動。
透過家長「賦予玩具恐龍有限度嘅生命」希望令仔女可以從唔同角度認識世界,
兼且慢慢培養自理能力。

起初,恐龍們開始的時候都有「紀律」地享受佢地嘅時光

後來,呢種享受過後往往為其他人帶黎唔少麻煩。慢慢小朋友見到大約也感受到這種麻煩吧?

恐龍們越黎越過份了…

日復日,這個時候,開始抓狂了吧? 或許小朋友也開始感受到不自律帶來的麻煩

「媽,恐龍們在我的房間裡塗鴉了,真的不是我做的,你看! 」甚至埋怨

不過並非只有搗旦
「阿仔玩完,恐龍玩完都會自己沖涼架」

其實恐龍也會做好事… 包括幫小朋友慶祝生日….

結果,亦都吸引到一班家長嘅注意。開始慢慢地組織起來…
越黎越多家長響應呢個活動。
不過要參與的話,Dinovember已經完左。下年請早。
或者想睇返嘅可以上去Facebook Page 度。
https://www.facebook.com/dinovember
今次活動,無任何宣傳的情況下得以廣傳,
吸引到一班家長重新關注科技嘅普及會唔會影響到小朋友嘅創意。
當然其幽默有趣抵死嘅恐龍仔生活是為最大功勞,
但亦別忘記要活動得以持續,
就得考慮是否協助解決用家問題,為其增值。
否則,再好的內容,仍然觸動不了受眾已經。

不過又講返怪獸家長,
點解我地唔俾返一個小朋友健康成長嘅自由
而逼佢地上乜班乜班呢?

精彩相集:

 

Photo: A shadow-puppet drama of Homeric proportions.

 


17
Nov 13

Volvo 世紀一擘

 

呢兩日,最令人矚目莫過於Volvo 的Epic Split 。特技人Jean-Claude Van Damme呢一擘,係呢三日裡面就足足有有成一千六百萬個View 。
當中,除左呢驚世一擘之外,Jean-Claude Van Damme 嘅獨白同埋配樂都猶其出色,將Volvo Trucks 嘅剛柔都完全帶出。

Volvo Trucks Epic Split 特技片在短時間內大收旺場,大家突然都將目光放到這品牌之上。原來起用特技去做Volvo Trucks的廣告已經不是第一次。去年Volvo 就起用在世上最高地方走鋼線世界記錄保持者Faith Dickey 去拍第一條關於Volvo Trucks 的Viral Video 。

翻查之下,這教人瘋狂的點子,執行的是一間瑞典的Agency Forsman Bodenfors 。可是,最意料不到的原來真正背後始作俑者的其實是剛剛退休,Volvo Trucks 的前VP Ulf Nordqvist 。他老人家已退休,大概沒有人會知道他從那得到的構思。不過「用特技去宣傳Volvo Trucks」這瘋狂的創意,顯現是明智的一步。不過話說,如果政府個段「駛出真功夫,方為大師傅嘅片」俾呢間拍,唔知會有咩效果呢?  (不計budget)


23
Aug 10

轉載出處,這是禮貌,也是對自己人格的尊重!

作為博客,引用別人的內容,轉載出處,這是禮貌,也是對作者的尊重。有些人,不單不問自取,而且還順理順將拿來作自己的博文。這種抽水的行為,可恥。

希望其他博客可以引以為鑑! 敬請對自己的人格自重!


14
Jun 10

Télépopmusik ﹣Breathe #MusicMonday

你能夠感受這首歌帶來的熱力嗎?